புவெப்லா (Puebla, எசுப்பானிய ஒலிப்பு: [ˈpweβla]), முறையாக இரோயிகா புவெப்லா டெ சரகோசா (Heróica Puebla de Zaragoza), புவெப்லா நகரம், புவெப்லா மாநிலத்தின் தலைநகரமும் மிகப் பெரிய நகரமும் ஆகும். மெக்சிக்கோவின் ஐந்து மிக முக்கியமான எசுப்பானியக் குடியேற்றங்களில் ஒன்றாகும். குடியேற்றக் காலத்தில் திட்டமிட்டுக் கட்டப்பட்ட இந்த நகரம் மெக்சிக்கோவின் மையப்பகுதியில் மெக்சிக்கோ நகரத்திலிருந்து தென்கிழக்கே 60 miles (97 km) தொலைவிலும் மெக்சிக்கோவின் முதன்மையான அத்திலாந்திக்குப் பெருங்கடல் துறைமுக நகரமான வேராகுரூசுக்கு மேற்கிலும் இந்த இரு நகரங்களையும் இணைக்கும் தடத்தில் பள்ளத்தாக்கில் அமைந்துள்ளது.தற்கால புவெப்லா மிகவும் தொழில்மயமாக்கப்பட்ட நகரமாகும்.
வரலாற்றுச் சிறப்புமிக்க இந்த நகரத்தை சரகோசாவின் வீர நகரம் என்றும் தேவதைகளின் நகரம் என்றும் ஓடுகளின் நகரம் என்றும் குறிப்பிடுகின்றனர். இது முழுமையாக எசுப்பானியர்களால் கட்டமைக்கப்பட்டமையால் இங்குள்ள கட்டிடக்கலையும் பண்பாடும் ஏனைய ஐரோப்பிய குடியேற்ற நகரங்களைப் போலவே உள்ளன. இக்காலத்திய நகரங்கள் பலவும் ஏற்கெனவே இருந்த தொல்குடி மக்களின் நகரங்களுக்குள் கட்டப்பட்டிருந்தன. புவெப்லாவின் வரலாற்றுச் சிறப்புமிக்க மையப்பகுதி குடியேற்றவாத எசுப்பானியப் பண்பாட்டிற்கான காட்சிக்கூடமாக விளங்குகின்றது. 17வது, 18வது நூற்றாண்டு ஐரோப்பியக் கட்டிடக் கலையை இங்கு காணலாம்.
புவெப்லாவின் தட்பவெப்பநிலை ஆண்டு முழுமையும் இதமாக உள்ளது.
விக்கிமீடியா பொதுவகத்தில் புவெப்லா நகரம் தொடர்புடைய பல ஊடகக் கோப்புகள் உள்ளன. |