சிம்போரசோ (Chimborazo) என்பது தற்போது இயங்காத நிலையில் உள்ள ஓர் எரிமலை ஆகும். இது எக்குவடோர் நாட்டில் உள்ளது. அந்தீசு மலைத் தொடரில் உள்ள புகழ் வாய்ந்த மலை இதுவாகும். புவியின் நடுவிலிருந்து கூடிய தூரத்தில் உள்ள இடம் இம்மலையின் உச்சியே ஆகும் (புவி கிடையாகச் சற்று நீள்வட்ட வடிவில் உள்ளது.). புவியிலிருந்து விண்வெளிக்கு அருகே உள்ள இடமும் இதுவே. நிலநடுக்கோட்டுக்கு அருகில் இருந்தாலும் இதன் உச்சியானது ஆண்டு முழுவதும் பனியால் மூடப்பட்டிருக்கும். இவ்வெரிமலை கடைசியாக கி. பி. 550 ஆம் ஆண்டு வெடித்தது.