ஆர்ட் இன்ஸ்டியூட் ஆப் சிகாகோ (Art Institute of Chicago) என்பது ஐக்கிய அமெரிக்காவின் சிகாகோ நகரில் அமைந்துள்ள கலைக்கள்ஞ்சிய அருங்காட்சியகம் ஆகும். இவ்வருங்காட்சியகம் மிகப்பிரம்மாண்டமான மூன்று கட்டடங்களில் இயங்குகிறது. இம்மூன்று கட்டடங்களும் முதல் தளத்துடன் இணைக்கப்பட்டுள்ளன.
கீழ் தளத்தில் ஓய்வறைகள், தொலைபேசியகம், குடிநீர் குழாய்கள், ஒளிப்பட காட்சியறை, கட்டடக்கலைக் காட்சியறை போன்றவை அமைக்கப்பட்டுள்ளன. அங்கே அருங்காட்சியக விற்பனைப் பிரிவும் செயல்படுகிறது. அதில் அருங்காட்சியகத்தில் காட்சிப்படுத்தப்பட்டுள்ள ஓவியங்களின் நகல்கள் வெவ்வேறு அளவுகளிலும், ஓவியங்கள் அடங்கிய நூல்களும் கிடைக்கின்றன. மேலும் இக்கீழ்தளத்தில் அதற்கென தனியாக உள்ள அரங்கில் அவ்வப்போது உலகின் பல பாகங்களில் இருந்து சிறப்புக் கண்காட்சிகளும் நடக்கின்றன.
முதல் தளத்தில் ஜப்பானிய, சீன, கொரிய கலைப்படைப்புகளும், நவீன சமகால ஓவிங்களும், போர்க்கருவிகளும், ஐரோப்பிய அலங்கார கலைப்பொருட்களும், ஆப்பிரிக்க, பழைய அமெரிக்க கலைப்படைப்புகளும் வைக்கப்பட்டிருக்கின்றன.
இரண்டாவது தளத்தில் நவீன மற்றும் சமகால அமெரிக்க ஐரோப்பிய ஓவியங்களும், சிற்பங்களும், இம்ப்ரசனிச, போஸ்ட் இம்ரசனிச ஓவியங்களும் 1400இல் இருந்து 1900வரையிலான ஐரோப்பிய ஓவியங்களும், சிற்பங்களும், கட்டடக்கலை பற்றிய ஒரு பிரிவும் அதில் உள்ளன. கிளவுட் மேனட், பால் செசானோ, டச்சு ஓவியர் வின்செண்ட் வான்கா, நார்வே ஓவியர் எட்வர்ட் மங்க், ஸ்பானிய ஓவியர்கள் பப்லோ பிக்காசோ, பிரான்சிஸ் கோயா, பிரஞ்சு ஓவியர்கள் ஹென்றி மாத்யூஸ், பால் காகைன், ஜார்ஜ் பிராக், விளாமிங், மேரிகிராட், எடவர்ட் டீகாஸ், எட்வர்ட் மேனட், சூரட் போன்றோருடைய ஓவியங்களும், பிளமிய ஓவியர்களான பீட்டர்பால் ரூபன்சின் ஓவிங்களும், பிரித்தானிய ஓவியர்களான ஜான் கான்ஸ்டபில், டர்னர் போன்ற பல்வேறு ஓவியர்களின் ஒவியங்கள் இங்கு காணப்படுகின்றன.